បន្ទាយមានជ័យ៖ កាលពីវេលាម៉ោង ១១និង៣០នាទី ថ្ងៃទី១៥ ខែកុម្ភៈ ប្រជាពលរដ្ឋ ប្រទះឃើញសាកសពមានសភាពស្អុយរលួយ មិនស្គាល់អត្តសញ្ញាណ នៅចំណុចអូរគៀប ភូមិសាស្រ្តភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ។

នាយប៉ុស្តិ៍ឃុំស្លក្រាម លោកវរសេនីយ៍ត្រី រិន ឡឹប បានឱ្យដឹងថា នៅចន្លោះម៉ោង ១១និង៣០នាទី ថ្ងៃទី១៥ខែកុម្ភៈម្សិលមិញ មានប្រជាពលរដ្ឋដែលត្រូវជាកូនឈ្នួល ដាំបាយឱ្យតៃកុងអែសស្កា បានប្រទះឃើញមនុស្សស្លាប់ម្នាក់ មានសភាពរលេះរលួយ នៅចំណុចអូរគៀបភូមិសាស្រ្តឃុំស្លក្រាម ស្រុកស្វាយចេក ខេត្តបន្ទាយមានជ័យ។ សពភេទប្រុស អាយុចន្លោះ ៥០ទៅ ៦០ឆ្នាំ ស្លៀកខោកីឡាពណ៌ខៀវឆ្នូតពណ៌ក្រហម អាវដៃវែងការ៉ូពណ៌ស-ខ្មៅ។

នាយប៉ុស្តិ៍ឃុំស្លក្រាម បានបញ្ជាក់ថា ក្រោយពីទទួលបានព័ត៌មាន កម្លាំងសមត្ថកិច្ចបានបង្កើតគណៈកម្មការត្រួតពិនិត្យ និងវិភាគសាកសព។

យោងតាមការត្រួតពិនិត្យសាកសព សមត្ថកិច្ច បានបញ្ជាក់ថា ជនរងគ្រោះបានស្លាប់ដោយសារ ដាច់បាយដាច់ ទឹកបណ្ដាលឱ្យដាច់ខ្យល់ស្លាប់ ពោលមិនជាប់ពាក់ព័ន្ធនិងបទល្មើសឃាតកម្មឡើយ៕